စံပယ်တင်ယုတ်မာမှုတွေနဲ့ကမ္ဘာ•

•
အောင်မှူးဝေ

၁။
သွေးစက်တိုင်းကိုမီးလောင်ပြီး
ခံစားချက်တိုင်းပြာကျတယ်
ရပိုင်ခွင့်တွေကရေမျောကမ်းတင်ဖြစ်ပြီး
ချမ်းသာမှုဟာရေစီးရေလာမကောင်းဘူး
ထမင်းဝတိုင်းမကောင်းမှုကိုပဲတွေးနေတယ်
ဟိုရှေ့ကတင်ပါးဝိုင်းဝိုင်းလေးကိုဝိုက်လိုက်ရဆိုတာမျိုး
လူထုဆန္ဒကိုမတရားကျင့်မယ်ဆိုတာမျိုး
နှစ်ပေါင်းငါးဆယ်လောက်လူလိုမနေရအမိန့်နဲ့
စာရွက်ပေါ်မှာပဲပညာတတ်စာရင်းပေါက်သူတွေ
သမိုင်းကိုမင်ဖျက်ဆေးနဲ့သွေးအေးအေးအဖျက်ခံထားရတယ်။
ကိုယ်ချင်းစာတရားကင်းမဲ့မှုအနံ့ပြင်းပြင်းနဲ့သေနတ်ပြောင်းတွေဟာ
သုသာန်တွေကိုပျော်စေတယ်
ဒီကမ္ဘာမှာ
၁၈ရက်ပဲသမ္မတဖြစ်ခဲ့သူရှိသလို
နှစ်၂၀ကျော်ရာဇပလ္လင်မှာအမြစ်စွဲနေသူလည်းရှိရဲ့
ပြည်သူလူထုဟာ
ဆီကိုရေချိုးနေရာက
ငတ်ပြတ်ရတာကိုဝါသနာထုံလာတယ်
စပါးတောင်လိုပုံရာက
ဆန်နို့ဆီဗူးတစ်လုံးပေးပါဘက်ကို
ဦးနှောက်သွေးကြောပြတ်သူလို
ယိုင်လဲလာတယ်။
မှောင်နေတဲ့လမ်းတွေမှာ
မှောင်နေတဲ့စိတ်ကူးနဲ့ကလေးတွေဟာ
လမ်းလယ်ခေါင်မှာသံဝါသပြုတတ်လာတယ်
အေးဆေးပဲ။
ချိုမြိန်တဲ့ပုံပြင်တွေကိုတစ်လတစ်ခါပုံမှန်စားသုံးပြီး
လှချင်ယောင်ဆောင်တဲ့အိပ်မက်တွေကိုမက်လာတယ်
အိပ်ရာကနိုးတော့လူသေတွေလိုပဲ
အနာဂတ်ကအေးစက်တောင့်တင်းလို့။
စံပယ်တင်ယုတ်မာမှုတွေနဲ့
ကမ္ဘာ။
၂။
ဒီကမ္ဘာဟာ
အတိတ်ကတော့သက်ဦးဆံပိုင်စနစ်ပဲ
ပြည်သူရဲ့ဆံပင်ကိုဘုရင်ကပိုင်တယ်ဆိုတော့
ဘုရင်ကဆံသဆရာပေါ့။
ဘုရင်ဆိုတာဘုရားအလောင်းမို့
စိတ်နဲ့တောင်မပြစ်မှားရဲဘူး
သည်မောင်က
ညာလက်ရုံးမီးဟုန်းဟုန်းတောက်ဆိုသကိုး။
ယောက်ျားသားများအားကျဖွယ်တစ်ခုက
ဘုရင်ဆိုတာ
မိန်းမအများကြီးယူနိုင်တာပဲ
ဘုရင်တွေလူကုန်ကူးတော့
ပဏ္ဏာဆက်တယ်ခေါ်ပေါ့
တရားတယ်။
ရေတွေမြေတွေအကုန်လုံးကဘုရင်ပိုင်ဆိုတော့
အများသုံးအိမ်သာတွေလည်းဘုရင်ပိုင်တာပေါ့
ကောင်းကင်အထိအာဏာစက်သက်ရောက်တယ်ဆိုပြီး
အဲ့ဒီခေတ်က
လေယာဉ်ပျံမပေါ်ခဲ့ဘူးလေ။
လေယာဉ်ပျံပေါ်တဲ့ခေတ်လည်းရောက်ရော
ကိုယ်ပိုင်လေယာဉ်နဲ့ဈေးဝယ်ထွက်ကြတယ်။
ဘုရင်ကကိုယ့်နှမကိုမျက်စပစ်လို့ရပေမယ့်
ဘုရင့်နှမကိုကိုယ်ကမျက်စပစ်ရင်
မျက်လုံးဖောက်ထုတ်ခံရတယ်။
လူသားတိုင်းဟာ
ကိုယ်ပိုင်ဂုဏ်သိက္ခာနဲ့မွေးဖွားလာကြတယ်
ဒီစကားဟာ
ဘုရင်တွေအတွက်တော့ဟာသပဲ
ပြည်သူလူထုကောင်းစားရေးဆိုတဲ့စကားကြောင့်
ဘုရင်တစ်ထောင်အသက်ရှူရပ်ဖူးတယ်
စံပယ်တင်ယုတ်မာမှုတွေနဲ့ကမ္ဘာလေ
ရက်ရက်စက်စက်
လှတယ်။
၃။
တစ်ခါတစ်ခါ
ကွန်ပျူတာရှေ့ထိုင်ပြီး
ကျောက်ခေတ်ကိုပြန်သွားတယ်
လူတွေကိုလူတွေကဖမ်းပြီး
တိရစ္ဆာန်တစ်ကောင်လိုနှိပ်စက်တယ်။
လမ်းခင်းကျောက်ခဲလိုနှလုံးသားနဲ့
ဝါဂွမ်းစလေးလိုနူးညံ့ပြသူတွေဟာ
ဇာတ်လိုက်ပဲ။
အကျဉ်းထောင်ထဲ
ခြေကျင်းကိုတီထွင်ခဲ့သူကြီးလည်း
ခြေကျင်းပြန်ခတ်ခံရတာပဲ
သံဝေဂတွေ
မိုးလုံးပြည့်အောင်ရပါတယ်။
တရားမျှတမှုနဲ့
အမှန်တရားကိုကယ်တင်သူတွေကဗီလိန်
အေးချမ်းစွာဆန္ဒဖော်ထုတ်သူတွေက
ဆူပူလှုံဆော်ရေးသမား
မီဒီယာဆိုတာသတင်းရောင်းစားပြီး
ပြည်သူလူထုကိုရောဂါပေးနေတာ----တဲ့
လူလူချင်းနောက်ပြောင်တာတောင်
ကမ္ဘာကိုအကြည်ညိုပျက်စေမှုနဲ့
ဖမ်းလို့ရတဲ့ကမ္ဘာ။
ကမ္ဘာမြေအမှီပြုတဲ့
လူထုအားလုံးခွေးသေဝက်သေဖို့ပဲကျန်တော့တယ်။
သြော်
စံပယ်တင်ယုတ်မာမှုလေးနဲ့ကမ္ဘာ။
၎။
ဒီကမ္ဘာမှာ
ဆင်ဖြူတော်ပိုင်ချင်တာလည်းကင်ဆာပဲ
ချိုးဖြူငှက်ကိုသတ်စားပြီးငြိမ်းချမ်းရေးလို့
ထထအော်တယ်။
ရေထဲမျောလာတဲ့ဆင်သေကြီးကို
မင်းအာဏာနဲ့အတင်းရပ်ခိုင်း
တစ်စီးရှင်အမည်ခံသူလည်းရှိခဲ့
တခြားကမ္ဘာကိုဆင်ဖြူတောင်း
မရတော့စစ်ခင်း
လူ့အသက်များစွာနဲ့ဆင်တစ်ကောင်ကိုလည်းလဲလှယ်ဖူးခဲ့တယ်။
နန်းရင်ပြင်မှာ
ထမင်းတွေဟင်းတွေအပြည့်ခင်း
နင်းချေပြီးနန်းတက်တဲ့ဘုရင်လည်းရှိဖူးတယ်။
သာသနာပိုင်ကိုသတ်ပစ်တဲ့ကမ္ဘာ
တိပိဋကကိုထောင်ချတဲ့ကမ္ဘာ
ဒီကမ္ဘာမှာအပြစ်မရှိရှာပါဘူး
စံပယ်တင်ယုတ်မာမှုကလေးပဲရှိပါတယ်။
၅။
လျှပ်စစ်မီးအတွက်အခွန်တွေပုံမှန်ကောက်ပြီး
လျှပ်စစ်မီးပုံမှန်မလာတဲ့ကမ္ဘာ
ရေခွန်တွေပုံမှန်ကောက်ပြီး
ရေပုံမှန်မလာတဲ့ကမ္ဘာ
အမှိုက်အိတ်တွေရောင်းစားပြီး
အမှိုက်ပုံမှန်မသိမ်းတဲ့ကမ္ဘာ
မီးအားကမီးယပ်ချမ်းထသလိုတက်လိုက်ကျလိုက်မို့
မီးခဏခဏလောင်တဲ့ကမ္ဘာ
ကန်ထရိုက်တိုက်တွေပြိုကျပြီး
လူတွေမာလကီးယားတဲ့ကမ္ဘာ
တို့ဘဝတို့ကမ္ဘာဟာ
ငရဲကြီးရှစ်ထပ်ကိုဆေးအသစ်သုတ်ထားသလိုလို
ပြိတ္တာဘုံကိုအလှပြင်ထားသလိုလို
မှန်ထဲပြန်ကြည့်မိတိုင်း
မှန်ကိုရိုက်ခွဲချင်မိတဲ့ကမ္ဘာ။
ဒီကမ္ဘာမှာအပြစ်မရှိရှာပါဘူး
စံပယ်တင်ယုတ်မာမှုလေးပဲရှိပါတယ်။
၆။
အသက်၁၄နှစ်လောက်ကလေးတွေဆိုက္ကားနင်းစားပြီး
သက်ကြီးရွယ်အိုတွေတောင်းစားနေရပြီ
ဒါလည်း
ရွှေကမ္ဘာလို့အော်နေတုန်း။
သားသည်မိခင်တွေဟာသတင်းစာတွေဖတ်ပြီး
စိတ်ဆင်းရဲလွန်းလို့----တဲ့
နို့မထွက်ကြတော့ဘူး။
ပြည်သူလူထုဟာ
ဒီနေ့ကမ္ဘာကိုမကျေနပ်တိုင်း
မနေ့ကဘုရင်တွေကိုအော်ဆဲမိကြတယ်
စိတ်တွေဟာကြိတ်ချေလို့မရခဲ့ပုံများ
နာကျည်းစိတ်တွေခဲနေပြီ။
ကျောင်းတံခါးကြီးကိုပိတ်
ကျောင်းသားတွေကိုသတ်ပစ်တဲ့ကမ္ဘာ
ရာဘာတောကြီးထဲ
အရှင်လတ်လတ်ကျင်းတူးပြီးမြှုပ်ပစ်တဲ့ကမ္ဘာ
ပရိတ်ရွတ်တဲ့သံဃာတွေကို
သူပုန်တွေလို့သဘောထားတဲ့ကမ္ဘာ
အလုပ်သမားတွေ
မဖြစ်စလောက်လခတိုးတောင်းတာကို
နံပါတ်တုတ်နဲ့ရိုက်တဲ့ကမ္ဘာ
ဒီကမ္ဘာဟာ
စံပယ်ပန်းလေးလိုဖြူစင်ခဲ့ပါသတဲ့
ကြည်ညိုလိုက်ကြပါ။
၇။
ဒီကမ္ဘာကို
တခြားကမ္ဘာကလူတွေလာအုပ်စိုးတုန်းက
တက္ကသိုလ်ကြီးတွေဆောက်ခဲ့တယ်
ဒီကမ္ဘာကိုဒီကမ္ဘာကလူတွေအုပ်စိုးတော့
သမဂ္ဂကျောင်းဆောင်ကြီးကိုဖောက်ခွဲပစ်လိုက်တယ်
ရွှေအုတ်နဲ့ပြန်ဆောက်ပေးပါ့မယ်--တဲ့
တခြားကမ္ဘာကလူတွေဖိနပ်စီးပြီး
ဘုရားပေါ်တက်တော့
အသည်းကိုခွေးကိုက်သလိုနာခဲ့တယ်
ကိုယ့်ကမ္ဘာကလူဟာ
ဖိနပ်စီးပြီးထီးဆောင်းတက်ပြတယ်
ငရဲကျမယ့်အကောင်---ဆိုတာကလွဲပြီး
ဘာမှမပြောရဲကြဘူး
ဒီကမ္ဘာကလူတွေဟာ
ဟေ့--မိကျောင်း
မင်းကိုရေနှစ်သတ်ပစ်မယ်ဆိုတဲ့စကားမျိုး
သိပ်ပြောတတ်တာပဲ။
သားသတ်သမားသမ္မတဖြစ်ဖူးတဲ့ကမ္ဘာဟာ
ရယ်သံကိုကကြောက်စရာကြီး။
အဖန်ငါးရာငါးကမ္ဘာလူဖြစ်ရှုံးဖို့က
ပန်းတိုင်လား။
ဒီကမ္ဘာဟာ
မိန်းမပျက်တစ်ယောက်ထက်ပိုမိုရိုးသားခဲ့ပါတယ်
စံပယ်တင်ယုတ်မာမှုလေးနဲ့လေ
သူက
ဖလော်ရာသုံးလို့သိပ်လုံခြုံတာပဲ။
၈။
ဘာမှမလုပ်နဲ့
ဘာမှမပြောနဲ့
ဘာမှမကြံစည်နဲ့
ကမ္ဘာကိုအုပ်စိုးသူတွေဟာပါရမီရှင်တွေ
ကုသိုလ်ကြီးလို့ဖြစ်နေတာ
ဖြေဆည်ရာစကားတွေဟာယင်တလောင်းလောင်းပဲ
ကျန်းမာကြပါစေ
ချမ်းသာကြပါစေ
ဓားထမ်းပြီးမေတ္တာပို့ကြတယ်
ဘာပဲဖြစ်ဖြစ်ထောက်ခံပါတယ်
တစ်ဆွေလုံးတစ်မျိုးလုံးတောင်းစားရလည်း
ထောက်ခံပါတယ်
ဒါပဲပြော
မင်းနဖူးကိုဘယ်တော့မှကျည်ဆံမမှန်ဘူး။
အဲဒီလိုချစ်စရာကောင်းတဲ့ကမ္ဘာ။
၉။
မင်းကောင်းမင်းမြတ်တွေအုပ်စိုးနေပါတယ်ဆိုမှ
ကိုယ်ပျောက်ခေါင်းတုံးက
ကောင်မလေးတွေကိုလိုက်ပွတ်သတဲ့
မိုးလေဝသညီညွတ်ပုံကတော့စံပဲဟေ့
မုန်တိုင်းကြီးတိုက်ပြီးလူတွေသေဖူးတယ်
စေတီတော်တွေပြိုကျတယ်။
ဘိန်းစားတွေချောင်းပစ်လို့
စစ်သားတွေလည်းသေဖူးတယ်
ဘယ်နတ်ဒေဝါပေးမှန်းမသိတဲ့
ဘွဲ့တံဆိပ်တွေလည်မှာဆွဲပြီး
အသက်ရှူကြပ်နေသူတွေရဲ့ကမ္ဘာ
အင်မတန်ပျော်စရာကောင်းပါလား
ပျော်ရင်းနဲ့ကြေကွဲနေရတယ်
ကတ္တရာလမ်းပေါ်ခုန်ချမိတဲ့
ကြက်ဥတွေလိုလေ။
၁၀။
ဒီကမ္ဘာမှာ
အာဏာရှင်တွေဘာပင်စိုက်စိုက်တင့်တယ်ပြီး
ငြိမ်းချမ်းရေးသမားရဲ့သစ်စေ့တွေဟာ
ပုပ်ကုန်တယ်။
ဒီကမ္ဘာမှာ
အာဏာရှင်မကောင်းကြောင်းရေးမိလို့
ဘဝပျက်ရတဲ့သူရဲကောင်းတွေရှိတယ်။
ဒီကမ္ဘာမှာ
လမ်းဘေးရွှေအတုတွေလို
နှစ်ရှည်လများအရောင်ပြောင်းနိုင်စွမ်းတဲ့
အသားထဲကလောက်တွေရှိတယ်။
သံဃာတော်တွေကိုမီးသင်္ကန်းကပ်ပြီး
လူတွေကိုတော့ရေခဲဝတ်စုံဝတ်ဖို့
ရေခဲတိုက်ထဲပို့လိုက်တယ်။
၁၁။
စင်တော်မှာ
ဘီလူးဆိုင်းတီးပြီးမင်းသားက
ကဖို့
ဘုန်းတန်ခိုးတေဇာတောက်ပကြတယ်ပေါ့
ဘယ်လိုကက
မကြိုက်လည်းကြည့်ရဦးမှာပဲ
ပွဲခင်းထဲ
ပွဲထိန်းတွေအပြညိ့မို့
စိတ်မပါရင်အိပ်နေပေါ့။
ခေတ်အဆက်ဆက်ရခဲ့တဲ့ဒဏ်ရာတွေလည်း
အခုတော့
အမာရွတ်ကလေးတွေထဲဝင်စားလို့
ပွတ်သပ်ချော့မြှူချင်စရာပဲ။
ဒီကမ္ဘာအတွက်သင်ခန်းစာဆိုတာ
အဆင်သင့်ထုပ်ပိုးပြီးသားမရှိဘူး
သူရောက်ချင်မှရောက်လာတာ။
ဒီကမ္ဘာကလူငယ်တွေဟာ
စစ်အုပ်ချုပ်ရေးကိုမမှုဘဲ
ထောင်ထဲရင်ကော့ဝင်သွားကြတယ်။
ထောင်ထဲရောက်တော့ကျောပါကော့ရောလေ
ဒီကမ္ဘာအတွက်ဒုက္ခဟာပိုလျှံလွန်းလို့
တခြားကမ္ဘာကိုတောင်ရောင်းစားနေရတယ်။
၁၂။
ဒီကဗျာဟာ
ကဗျာရေးသူရဲ့အာဘော်မဟုတ်ဘဲ
အသုံးမကျတဲ့ခေတ်စနစ်တွေနဲ့
ကဗျာရေးချင်စိတ်ရဲ့အာဘော်သာဖြစ်ပါတယ်။
သြော်
စံပယ်တင်ယုတ်မာမှုလေးနဲ့ကမ္ဘာရယ်။ ။

အောင်မှူးဝေ
၁၀-၃-၂၀၁၅
၁၀း၁၀း၁

•စံ ပ ယ် တ င် ယုတ်မာမှုတွေနဲ့ကမ္ဘာ-၂•

၁။

ခေတ်တွေကို
စာရေးစားပွဲပေါ်တင်ပြီး ရိုက်ခွဲပစ်မိတယ်
သံသယစိတ်နဲ့သင်္ဘောပျက်ခဲ့ရတဲ့ နေ့တွေ
အပြုံးတုတွေမှာ သွေးသံတရဲရဲ ညတွေ
ခဏလိုက်ခဲ့ပါ၊မေးစရာရှိလို့ပါ
၅/ည………
ငိုသံတွေနဲ့ ရက်လုပ်ထားတဲ့ ပွဲတက်အနမ်း
လောကဓံရဲ့ပွဲတော်ဟာ အရောင်တဖျတ်ဖျတ် လက်ခဲ့
ကောက်ကျစ်တဲ့ စံပယ်ရုံတစ္ဆေတွေအနီးမှာ
ရိုင်းစိုင်းတဲ့အနံ့တွေ မွှန်ထူနေခဲ့တုန်းကပေါ့
စံပယ်တင်ယုတ်မာမှုတွေနဲ့ကမ္ဘာ။

၂။

လက်လုပ်လက်စားသမားတွေရဲ့နိုင်ငံတော်
အောင်ပွဲခံသူတွေရဲ့ပျော်ရွှင်မှုက နှစ်၅၀
ရှုံးပွဲခံသူတွေရဲ့ဝမ်းနည်းမှုက နှစ် ၁၀၀
ကမ္ဘာ့မြေပုံပေါ်
အာဏာရှင်နှင်းတွေကြောင့်
တခိုက်ခိုက်တုန်နေရှာတဲ့ နိုင်ငံလေး။
တစ်ကိုယ်ကောင်းစိတ်တွေဟာ
နေရာအနှံ့ ရွာသွန်းနေဆဲပဲ
ငြိမ်းချမ်းရေးစကားပြောရအောင်
မင်းဓားကိုထုတ်လိုက်ပါ
ဘတ်စ်ကားသမားတွေ
ဖာအိမ်မှာစကားပြောသလို
သိပ်ကြိုက်လွန်းရင်ဖြတ်ပြီးလည်ပင်းမှာဆွဲထားလိုက်လို့
သွေးရူးသွေးတန်းထထအော်နေတဲ့ဆွေးနွေးမှုတွေ။
စံပယ်တင်ယုတ်မာမှုတွေနဲ့ကမ္ဘာ။

၃။

အနှိပ်ခန်းမှာ
ကိုယ့်သမီးအရွယ်လေးတွေနဲ့ပလူးနေသူတွေက
ဘုရားဘဏ္ဍာတော် စောင့်ရှောက်ထိန်းသိမ်းသူ
ဝက်သတ်သမားအငြိမ်းစားက
ရပ်ကွက်အုပ်ချုပ်ရေးမှူး
ပဒိုင်းပင်မှာ အင်ကြင်းပန်းတွေ ပွင့်တဲ့နိုင်ငံတော်။
မိန့်ခွန်းပြောရင်
စကားပြောစကားပြေမကွဲတဲ့
သောက်ရူးတွေက ခေါင်းပေါင်းစတလူလူ
သမိုင်းစာမျက်နှာတိုင်း သတ်ပုံမှားတဲ့လူ့တိရစ္ဆာန်တွေက
စေတနာနဲ့သတ်ပစ်မိတာပါလို့
အခါခါယုတ်မာရတာကို
အရသာတွေ့ပြီးရင်းတွေ့နေတဲ့ကမ္ဘာ။
၎။

ဝဋ်ကြွေးကြီးမားလွန်းသူတို့
မနက်လင်းတာနဲ့
အလှူခံစားရမလား ဖာခံစားရမလားတွေးပြီး
အိပ်မက်က တိုင်နဲ့ခေါင်းနဲ့ ပြေးဆောင့်လို့၊
လမ်းပေါ်မှာ မိုးမိနေတဲ့ ကြွပ်ကြွပ်အိတ်တွေလိုလျှောက်သွား
မျှော်လင့်ချက်တွေမိုးချုပ်တော့မှပြန်လာ
နာကျင်သူတွေရဲ့နာကျည်းမှုတိုင်း
အကြီးကြီး ညဉ့်နက်နေတဲ့ကမ္ဘာ
စံပယ်တင်ယုတ်မာမှုတွေနဲ့ကမ္ဘာ။
၅။

အားနေရင် သူများနောက်ကျောထိုးဖို့
အမနုဿဓားမြောင်တသသနဲ့
အကုသိုလ်နှစ်ဖက်သွားကိုထက်မြအောင်လုပ်တယ်
လူလစ်ရင် မုဆိုးမထဘီခိုးဖို့ဝန်မလေးဘူး
နောက်တော့
အဲ့ဒီ သောက်ပိန်းက သူရဲကောင်းဖြစ်ချင်ဖြစ်သွားတတ်တာမျိုး၊
ရေဆိုလည်း ရေဘက်က
မီးဆိုလည်းမီးဘက်က
သီးသန့်နေပါလား။
ထောင်ကထွက်စနိုင်ငံရေးသမားတွေဟာ
ကဗျာဆရာတွေကို ဘုရားတစ်ဆူဂူတစ်လုံး
နောက်တော့
ငါတို့လည်းရေးတတ်ပါတယ်ဆိုပြီး
လူကုံထံအမျိုးသမီးရဲ့ပူစီလို
လူရွေးပြီးအော်ဒါလိုက်တဲ့ဇာတ်ကို ခင်းလာတယ်။
ကဗျာဆရာဆိုတာ
နိုင်ငံရေးသမားအထက်ကပါကွာ
ငါတို့ကဗျာဆရာတွေသာ နိုင်ငံရေးလုပ်စားခဲ့ရင်
မင်းတို့တွေထောင်ထဲမှာတင်ငတ်သေကုန်ကြမှာ
လွတ်လာစရာအကြောင်းကိုမရှိဘူး။
နတ်တင်ပြီးသားထမင်းသိုးတွေလို
ညီညွတ်စွာလေးစားခြင်းတွေ
ခဏ ခဏ မသာပေါ်နေတဲ့ ကမ္ဘာ။
၆။

ခင်ဗျားတို့  ကဗျာဆရာတွေ
ခင်ဗျားတို့ စာရေးဆရာတွေ
ပျက်နေတဲ့ တရုတ်မီးစက်လို
အမှိုက်တွေဆို့နေတဲ့ရေပိုက်လို
ကိုယ့်အရည်အချင်းကိုယ် နှိုးထား ဖွင့်ထား
ခေတ်က
ခင်ဗျားမိန်းမနဲ့အိပ်နေလည်းစီးဝင်လာမှာ
စာရေးစားပွဲကို မြဲမြဲကိုင်ထား
ကိုယ့်ကဗျာ  ကိုယ့်စာထဲက
ကိုယ်ကိုယ်တိုင် စက္ကူစုတ်လိုလွင့်မသွားအောင်
နေရာတကာ ဆရာကြီးလုပ်ချင်တဲ့
ဝါရင့်သောက်ကျင့်ကြီးကိုပြင်
စာများများဖတ်
လူငယ်တွေဘာလုပ်နေလဲကြည့်
စာအုပ်အငှားဆိုင်တွေသေကုန်ပြီ
စာအုပ်ထုတ်ဝေသူတွေ မသေမရှင်
စာအုပ်အရောင်းဆိုင်ကြီးတွေကတော့
ဖုတ်ဝင်ပြီး သားစိမ်းငါးစိမ်းတောင်စားကုန်ပြီ။
အသံက
အခေါင်းထဲက ဝိညာဉ် ညည်းသံလို
ဘဝအခန်းစုတ်လေးထဲမှာ ပဲ့တင်ထပ်နေတယ်
အလင်းဖျော့ဖျော့လေးကို အမှောင်ထဲကနေလွမ်းမနေနဲ့
မြွေပွေးတွေထည့်မွေးထားတဲ့ဦးနှောက်ထဲက
နည်းနည်းသောက်သုံးကျနိုင်တဲ့ မှတ်ဥာဏ်တချို့
လောကထဲချပျိုးလိုက်
စိတ်နဲ့မတည့်ရင်
ကောင်းကင်ကြီးလည်းဆဲပစ်လိုက်
ဘယ်သောက်အစိုးရမှ
စာပေလောကအတွက် အားကိုးလို့မရတဲ့ကမ္ဘာ
စံပယ်တင်ယုတ်မာမှုတွေနဲ့ကမ္ဘာ။

၇။

မထိဘူး ထပ်ရေး
ဒီကဗျာက ခင်ဗျားကိုထိဖို့မဟုတ်ဘူး
ကျုပ်ကိုထိလို့ရေးနေတာ
ခင်ဗျားနေထိုင်တဲ့ကမ္ဘာမှာ
တကယ်ဖြစ်နေတာဘာတွေလဲအကုန်သိရဲ့လား
အမြန်လမ်းပေါ်
ကားပျက်လို့လမ်းဆင်းလျှောက်မိသူအပျိုကြီးတစ်ယောက်
မွေးကင်းစကလေးသုံးမြွှာပူးကြီးကောက်ရသလိုမျိုး
ဒုက္ခတံဆိပ်မိတ်ကပ်အဖုန်သားနဲ့
ခွတီးခွကျ လှပနေတဲ့ ကမ္ဘာ
စံပယ်တင်ယုတ်မာမှုတွေနဲ့ကမ္ဘာ။

၈။
အိမ်ထောင်မကျခင်က
အချစ်တွေ ရင်ထဲမှာအပြည့်ပဲ
အခုတော့
ရေတွေသွန်ပစ်လိုက်တဲ့ခွက်တစ်လုံးလို
အရှိတရားတွေကိုမုန်းခဲ့တယ်
ကိုယ်မသိခဲ့ရတဲ့ အကြောင်းတွေအတွက်
နာကျင်တယ်
ကဗျာရေးလို့မရအောင်
ရက်စက်စွာ နှောင့်ယှက်သူ
ဘယ်သူ့ကိုမဆိုမုန်းတယ်
စံပယ်တင်ယုတ်မာမှုတွေနဲ့ကမ္ဘာ။

၉။
ကန်းနေတဲ့မျိုးစေ့တွေက
မမြင်ရတဲ့သစ်ပင်တွေ ထထပေါက်တယ်
အမှောင်ဆုံးအသီးတွေ အမည်းဆုံးအပွင့်တွေ
ပွင့်တယ်
ကိုယ်ချင်းစာတရားလက်ကိုင်ထားကြပါအော်ဟစ်သူက
သူတစ်ပါးစိတ်ကို မီးနဲ့ရှို့ရှို့နေတော့မခက်ဘူးလား။
ကမ္ဘာကြီးတစ်ခုလုံးကိုသိတယ်ပြောပြီး
ကိုယ့်အိမ်နံပါတ်ကျမေ့နေတတ်တဲ့ကမ္ဘာ
စံပယ်တင်ယုတ်မာမှုတွေနဲ့ကမ္ဘာ။

၁၀။
5 star hotel တွေလိုတယ်
တန်ဖိုးနည်းအိမ်ရာတွေလိုတယ်
သင်တန်းကျောင်းတွေလိုတယ်
တရားဥပဒေစိုးမိုးမှုနဲ့
တန်ပြန်သပိတ်မှောက်တာတွေလိုတယ်
သပိတ်ပဲမှောက် လူမမှောက်စေနဲ့
ထွက်လာတဲ့ကလေး
ဘယ်သူ့အဖေခေါ်ရမှန်းမသိဖြစ်သွားမယ်
ရေးလည်းအလကားပဲ
ကနေဒါအစိုးရတောင်
သူတောင်းစားပပျောက်အောင်မလုပ်နိုင်ဘူး
တချို့က ဆယ်လီဗျစ်တီသူတောင်းစားဖြစ်ချင်တာ
ရုံးတွေမှာ။
အမည် မြန်မာ
ဝါသနာ အခွင့်သာရင်သာသလိုသောက်ကျိုးနည်းရတာ
အဲ့ဒီလို ငါတို့ ကမ္ဘာ။

၁၂။

အားအားရှိ ရှေးရှေးတုန်းကရွှေထီးလေးကိုပြန်ဆောင်းရတာအရသာ။
ငါတို့ရဲ့ကုန်းဘောင်အင်ပါယာကြီး
ငါတို့ရဲ့မြန်မာနိုင်ငံတော်မြေပုံကြီး
မဏိပူရကသည်းပြည်အထိ
ဇင်းမယ် လင်းဇင်း အယုဒ္ဓယ ထိုင်းနိုင်ငံအထိ
လေတိုးလိုက်တဲ့ဖွဲပုံကြီးလိုကျယ်ပြန့်ချင်တိုင်းကျယ်ပြန့်
မြန်မာဆိုကမ္ဘာက လန့်ခဲ့တယ်။
တစ်ပြည်လုံးကိုသိမ်းတယ်
စိတ်မဆိုးဘူး
လူတွေကိုသတ်တယ်
စိတ်မဆိုးဘူး
ဘုရင့်နန်းတော်နဲ့ဘုရားပရိဝုဏ်ထဲ
ကွမ်းတံတွေးတွေ ထွေးသွားတာကိုစိတ်အနာဆုံးပဲလို့
ထိုင်းဂိုက်တစ်ယောက်ကပြောတော့
ငါ့မှာ
ငိုဖို့ရယ်ဖို့ခက်ခဲ့
အဲ့ဒီလိုကမ္ဘာ။
၁၃။
နှစ်စဉ်နှစ်တိုင်း
စိတ်ကျရောဂါသည် သန်းတစ်ရာလောက်
ပုံမှန်ထုတ်လုပ်ပေးနေတဲ့ကမ္ဘာ
ဦးနှောက်ကို တင်းပြည့်ကျပ်ပြည့် အသုံးမချသူတို့
ပင်ပန်းချင်ယောင်ဆောင်ပြီး
နာကျင်မှုတွေနဲ့ အနားယူကြရာ ကမ္ဘာ
လူသားအားလုံးဟာ ခံစားချက်တွေရဲ့ထုတ်ကုန်
အကျိုးတရားအားလုံး
လူသားတွေရဲ့အသိဥာဏ်နဲ့လည်ပတ်နေတယ်ဆိုတာ
တဖြည်းဖြည်းမေ့လျော့လာတဲ့ကမ္ဘာ
လူသေဆုံးသွားပေမယ့်
အိပ်မက်တွေတော့ဆက်လက်ရှင်သန်ရစ်မှာပါလို့
သွေးထွက်သံယိုမျှော်လင့်ချက်ကို
ရင်ဝယ်ပိုက်ထားလေတဲ့ကမ္ဘာ။
၁၄။
ဒီကမ္ဘာနဲ့ပတ်သက်သမျှ
အချစ်ထက် ပိုပြီးချစ်စရာကောင်းတာတွေ အများကြီးရှိကြောင်း
အချစ်ကို ရှင်းပြရတာ ချစ်တယ်။

အမုန်းထက်ပိုပြီး မုန်းစရာကောင်းတာတွေ
အများကြီးရှိကြောင်း
အမုန်းကို ရှင်းပြရတာ မုန်းတယ်။
၁၅။
တရားစီရင်ခြင်းနေ့ မတိုင်ခင်
ဘုရားသခင်မျိုးစုံရဲ့မေတ္တာရိပ်မှာ
သစ္စာတရားရဲ့စီရင်ခြင်းကို
လည်စင်းခံနေရတဲ့ကမ္ဘာ
စံပယ်တင် ယုတ်မာမှုတွေနဲ့ကမ္ဘာပါပဲဗျာ။  ။

အောင်မှူးဝေ
၂၄၊၉၊၂၀၁၆